Un novo modelo de turismo para o Eixo Atlántico
O Eixo Atlántico impulsa un novo modelo turístico de excelencia, centrado no coñecemento profundo do territorio, o seu patrimonio e a súa natureza. Este modelo baséase en dous conceptos clave: o turismo de autor e o turismo policéntrico, que se presentan como alternativas ao turismo de masas, responsable en moitos destinos de impactos negativos sobre o entorno e de rexeitamento social.
Trátase dun enfoque respectuoso, equilibrado e sostible, que aposta por un turismo de calidade máis que de cantidade. O turismo de excelencia non é un turismo elitista, senón auténtico, arraigado e adaptado ás particularidades de cada lugar. O seu obxectivo é atraer visitantes que valoren a identidade, a cultura e o medio natural, e que contribúan ao desenvolvemento local sen xerar desequilibrios.
